• A formación, a primeira deste tipo que ofrece unha comunidade, diríxese a estudantes ou persoas traballadoras das áreas de recursos humanos, relacións laborais, asesorías ou organizacións sindicais e empresariais

  • A conselleira de Emprego e Igualdade, María Jesús Lorenzana, destacou na inauguración que Galicia investirá en 2022 16 millóns en medidas de corresponsabilidade e conciliación das persoas traballadoras

  • O Goberno galego incentivará ademais a igualdade no marco das relacións laborais con outros dous millóns de euros

  • Este ano convocaranse máis de 5.000 prazas de formación gratuíta en igualdade laboral a través do espazo virtual específico estreado o pasado outubro pola Xunta

A conselleira de Emprego e Igualdade, María Jesús Lorenzana puxo hoxe en valor as medidas coas que a Xunta está a apoiar a igualdade laboral, “como elemento estrutural e como motor empresarial, da economía e da sociedade galega”. Lorenzana inaugurou hoxe en Santiago de Compostela o primeiro curso especializado de igualdade entre mulleres e homes nas relacións laborais, unha actividade formativa sen precedentes noutras comunidades autónomas, polo seu carácter específico e duración, organizado coa Universidade de Vigo no Centro de Novas Tecnoloxías de Santiago de Compostela.


Lorenzana subliñou que en 2021, máis de 3.000 persoas recibiron o seu certificado de aproveitamento vinculado á formación en igualdade laboral ofrecida de maneira gratuíta pola Administración Autonómica, sendo ademais Galicia a primeira e única comunidade autónoma en impartila en modalidade virtual.

Este 2022 o Goberno galego ofertará máis de 20 cursos e un total de 5.000 prazas que afondarán, entre outras cuestións, na fenda salarial, a desconexión dixital, os teitos de cristal ou teletraballo. “Somos a primeira comunidade autónoma en impartir formación específica en igualdade laboral a toda a cidadanía, tanto aos axentes sociais como aos traballadores en xeral, como este curso superior que se acordou no seo do Diálogo Social”, remarcou a conselleira.

O Goberno galego destinará, por outra banda, este ano, 16 millóns de euros para posibilitar a redución da xornada laboral e mellorar a conciliación das persoas traballadoras no coidado e atención das súas fillas e fillos, e para apoiar a conciliación por maternidade ou paternidade dos autónomos, subvencionando a contratación doutra persoa para cubrir a baixa destes profesionais.


“A Xunta de Galicia segue a traballar na procura dunha igualdade real e efectiva entre mulleres e homes tamén no ámbito das relacións laborais, eido ao que este ano destinamos máis de 2 millóns de euros, principalmente para seguir formando, capacitando e fomentando a conciliación, a corresponsabilidade, a responsabilidade social empresarial e a igualdade laboral”, aseverou Lorenzana.

Formación especializada

O curso especializado que hoxe arrancou no Centro de Novas Tecnoloxías de Galicia celebrarase de forma presencial ata o 3 de xuño. Consta de 150 horas de formación, diríxese a estudantes e/ou graduados en áreas relacionadas co dereito do traballo e os recursos humanos, así como a profesionais deste sector, teñan ou non titulación, ou membros de organizacións empresariais e sindicais.

Os contidos están estruturados en 7 módulos de carácter teórico e dous prácticos que abordarán, entre outras cuestións, a igualdade retributiva, o deseño dos plans de igualdade, a prevención do acoso e as medidas de protección social no traballo.


Con esta actividade, o Goberno galego segue a ofrecer formación especializada en perspectiva de xénero que proporcione ás persoas destinatarias as ferramentas necesarias para poder implantar plans e medidas de igualdade tanto na empresa privada como no ámbito público.

Categorías

Actualidade Conciliación Formación Igualdade

Novas

Toda a actualidade e información de interese no ámbito da igualdade laboral.
Novidades en materia de igualdade laboral
29 Decembro 2022
Como cada mes, recapitulamos as novidades máis reseñables...
SEGUIR LENDO >
As achegas á igualdade laboral no ano 2022
22 Decembro 2022
O ano 2022 foi un período no que desde a Xunta de Galicia...
SEGUIR LENDO >
A Xunta avoga por unha ciencia en igualdade que cree máis oportunidades e aposte polo talento galego na entrega do premio Wonenburger 2022
20 Decembro 2022
O vicepresidente segundo e conselleiro de Presidencia,...
SEGUIR LENDO >
Lorenzana presenta o espazo de conciliación promovido no porto da Coruña pola Xunta de Galicia para axudar ás familias este Nadal
20 Decembro 2022
As instalacións, situadas no peirao do Parrote, abrirán...
SEGUIR LENDO >

Subscríbete ao noso boletín

E recibe todas as nosas novidades no teu correo electrónico.