• A directora xeral de Relacións Laborais, Elena Mancha, interveu hoxe na inauguración dun webinario organizado polo Instituto de Seguridade e Saúde Laboral de Galicia (Issga) no marco da súa programación formativa para este ano

  • Incidiuse en que non é o mesmo unha situación do risco que un embarazo de risco, polo que é preciso adaptar, no casos que sexan precisos, os postos de traballo

    Trátase da primeira das 16 xornadas formativas que organizará o Instituto ao longo deste ano e que se centrarán nos riscos psicosociais desde unha perspectiva de xénero

A directora xeral de Relacións Laborais, Elena Mancha, participou hoxe na inauguración do webinario da xornada técnica Xestión do risco durante o embarazo e a lactación, organizada polo Instituto de Seguridade e Saúde Laboral de Galicia (Issga), no marco da súa programación formativa para este ano. En colaboración con Ibermutua, a iniciativa tivo como obxectivo analizar a xestión do risco durante o embarazo e a lactación, desde o marco normativo que o regula, o procedemento que se debe seguir na súa tramitación, así como os riscos clínicos e laborais e os diferentes axentes que interveñen.

Para a Xunta de Galicia é importante a promoción da seguridade e a saúde no traballo en colectivos específicos ofrecendo, neste caso, información ás mulleres embarazadas ou en período de lactación e asesorando ás empresas en materia de cumprimento das obrigas relacionadas cos postos de traballo durante estes períodos. A situación de risco durante o embarazo non é o mesmo que un embarazo de risco, destacou Mancha. Polo tanto, a xornada incidiu en que a situación protexida é a relacionada con axentes, procedementos ou condicións do posto de traballo.

A Lei de Prevención de Riscos Laborais (Lei 31/1995, do 8 de novembro) regula, no artigo 26, a protección da maternidade a través dunha especial atención ao período de embarazo e de lactación natural, co obxecto de garantir que non se produzan danos para a muller, o feto ou o fillo. En palabras da directora xeral, esta obriga afecta a todo tipo de empresas, calquera que sexa o seu tamaño.

Este artigo resúmese en catro aspectos principais: avaliar os riscos do posto de traballo tomando en consideración a situación de embarazo ou lactación natural; prever, se fose preciso, a adopción de medidas preventivas complementarias para que a traballadora poida seguir desempeñando o seu labor profesional; en caso de non poder adaptarse o posto de traballo, deberase proceder a un cambio temporal de posto , que se rexerá polas normas da mobilidade funcional e terá efectos ata o momento en que o estado de saúde da traballadora permita a súa reincorporación ao anterior posto; en caso de non existir postos de traballo compatibles co estado de saúde da traballadora, procederíase á suspensión de contrato por risco durante o embarazo ou durante a lactación natural, polo período necesario para a protección da súa saúde e mentres persista a imposibilidade de reincorporarse ao seu posto anterior ou a outro posto compatible co seu estado.

Estas prestacións, en resumo, teñen como fundamento protexer á traballadora embarazada e ao feto, en caso de embarazo, ou fillo, en caso de lactación natural, cando non existan na empresa postos de traballo compatibles con estas situacións.

Durante a xornada describiuse, polo tanto, o procedemento de recoñecemento, denegación, anulación ou suspensión deste dereito, ao tempo que se detallaron os riscos laborais durante o embarazo como son, entre outros: radiacións ionizantes e non ionizantes, vibracións, temperaturas extremas ou ruído; manipulación de cargas, flexión de tronco, bipedestación, sedestación ou actividades deportivas; exposición a axentes químicos, citostáticos, axentes anestésicos inhalatorios ou carburantes; brucella ou toxoplasma; ou axentes estresores, así como o tempo de traballo.

A iniciativa, destinada a técnicos de prevención de riscos laborais, delegados de prevención, axentes sociais, empresarios, persoal traballador e persoas con interese nesta materia, rematou cunha mesa redonda na que os axentes sociais deron a súa visión desde un punto de técnico a través de profesionais dos seus gabinetes de seguridade e saúde no traballo. Participaron, entre outros, persoal técnico das organizacións sindicais e empresarial que forman parte do Consello Reitor e da comisión para a integración da igualdade do Issga.

Trátase da primeira xornada formativa que imparte este ano o Issga, nesta ocasión en formato webinario, das 16 que se organizarán ao longo do 2022. O teletraballo, a saúde mental ou o estres serán outros dos temas que se abordarán neste ciclo formativo, aspectos que, segundo indicou Mancha, afectan “de modo importante” ao colectivo feminino “incrementando o risco psicosocial, polo que require toda a atención necesaria das administracións que deben velar pola seguridade das mulleres e aplicar ese necesario enfoque de xénero”, engadiu. Así, e, segundo apuntou a directora xeral, a prevención dos riscos psicosociais será un aspecto no que incidirá o Issga ao longo deste ano para que as empresas poidan mellorar e alcanzar “unha madurez” na protección fronte aos mesmos, ao igual que está a ocorrer cos riscos de seguridade, hixiénicos e ergonómicos.

Categorías

Actualidade

Novas

Toda a actualidade e información de interese no ámbito da igualdade laboral.
Novidades en materia de igualdade laboral
29 Decembro 2022
Como cada mes, recapitulamos as novidades máis reseñables...
SEGUIR LENDO >
As achegas á igualdade laboral no ano 2022
22 Decembro 2022
O ano 2022 foi un período no que desde a Xunta de Galicia...
SEGUIR LENDO >
A Xunta avoga por unha ciencia en igualdade que cree máis oportunidades e aposte polo talento galego na entrega do premio Wonenburger 2022
20 Decembro 2022
O vicepresidente segundo e conselleiro de Presidencia,...
SEGUIR LENDO >
Lorenzana presenta o espazo de conciliación promovido no porto da Coruña pola Xunta de Galicia para axudar ás familias este Nadal
20 Decembro 2022
As instalacións, situadas no peirao do Parrote, abrirán...
SEGUIR LENDO >

Subscríbete ao noso boletín

E recibe todas as nosas novidades no teu correo electrónico.