Dende a Dirección Xeral de Relacións Laborais da Consellería de Emprego e Igualdade da Xunta de Galicia informamos de que vimos de por en marcha un novo campus de formación en liña en materia de igualdade. Esta nova plataforma formativa está dirixida a fomentar, formar e sensibilizar á sociedade na igualdade laboral efectiva entre homes e mulleres a través de accións formativas. As accións formativas que se van realizar na plataforma serán gratuítas e enmarcadas en diferentes ámbitos como son:
- A conciliación e a corresponsabilidade
- O rexistro retributivo
- O acoso laboral
- O teletraballo
- Moitos outros asuntos relativos á igualdade laboral.
Os cursos formativos abertos
Na actualidade están abertos á inscrición gratuíta dous cursos formativos en materia de igualdade laboral que terán lugar entre os meses de outubro e novembro. Os cursos ofertados son os seguintes:
1. Curso básico en igualdade laboral. 8 horas de duración.
O obxectivo do curso é facilitar ao tecido empresarial a incorporación da igualdade laboral, acercando os coñecementos necesarios sobre a negociación dos plans de igualdade, diagnose, igualdade retributiva, medidas para fomentar a igualdade laboral e os protocolos para loitar contra o acoso sexual e por razón de sexo.
Enfocado para o persoal laboral de pemes galegas e interlocutores sociais de Galicia.
O prazo de inscrición será ata o 13 de outubro.
O prazo de validación da inscrición é do 14 ao 18 de outubro.
O prazo de execución do curso é dende o 20 de outubro ata o 10 de novembro.
A ligazón de inscrición é: https://igualdade-laboral.gal/
2. Curso teórico-práctico sobre a prevención e tratamento do acoso sexual e por razón de sexo no traballo. 10 horas de duración.
O obxectivo deste curso é profundar en conceptos de acoso sexual e por razón de sexo, facilitando a identificación de conductas que poden ser constitutivas do mesmo.
Así mesmo, nesta formación trataranse as consecuencias xurídicas do acoso e a súa tipificación no orde penal e administrativo, así como a aplicación de políticas de prevención e tratamento do acoso sexual e por razón de sexo no traballo, proporcionando ás persoas participantes as ferramentas e modelos para a posta en práctica de ditas políticas e as orientacións prácticas para a investigación de situacións de acoso sexual e por razón de sexo no traballo.
Está orientado para as persoas responsables da implantación do protocolo de prevención e actuación por acoso laboral nas entidades.
O prazo de inscrición será ata o 13 de outubro.
O prazo de validación da inscrición é do 14 ao 18 de outubro.
O prazo de execución do curso é dun mes, dende o 20 de outubro ata o 20 de novembro.
A ligazón de inscrición é: https://igualdade-laboral.gal/
O novo campus de formación en liña
O novo campus de formación en liña é un espazo virtual de aprendizaxe que favorece os procesos comunicativos e aprendizaxes compartidas, posibilitando unha construción significativa e colaborativa de coñecemento. Tralo rexistro na plataforma, cada usuario ou usuaria poderá cambiar e completar os datos do seu perfil e anotarse nos cursos que teñen a inscrición aberta.
Para máis información podes acceder ó espazo web https://igualdade-laboral.gal/ a través do cal se che informará das novidades xurídicas, cursos e webinarios que se leven a cabo en materia de igualdade.
