En base aos criterios de eficacia que presiden a organización administrativa e a eficiencia e contención no gasto público, a Consellería de Emprego e Igualdade refundiu nun único departamento as competencias que ata setembro de 2020 se exercían por dúas entidades, agora extintas: a Consellería de Economía, Emprego e Industria, na área de emprego e, a Secretaría Xeral da Igualdade, na área da promoción e adopción das medidas encamiñadas á consecución da igualdade real e efectiva entre mulleres e homes.
A Consellería, tras a recolocación de departamentos e distribución de funcións, divídese en sete órganos superiores e direccións, entre as que se atopa a Dirección Xeral de Relacións Laborais. Analizando en detalle estas áreas atopamos á Conselleira, na actualidade Dona María Jesús Lorenzana, a Secretaría Xeral Técnica, a Secretaría Xeral da Igualdade, a Dirección Xeral de Emprego, Traballo Autónomo e Economía Social, a Dirección Xeral de Formación e Colocación, as Xefaturas territoriais e a nosa Dirección Xeral de Relacións Laborais.
Imaxe: Xunta de Galicia
Hoxe imos introducir as funcións e estrutura da Dirección Xeral de Relacións Laborais para saber máis e contextualizar a área administrativa na que se inclúe a igualdade laboral e a conciliación e corresponsabilidade da vida persoal, familiar e laboral dentro da administración autonómica de Galicia. Imos alá!
As funcións da Dirección Xeral de Relacións Laborais
Todas as áreas da Consellería de Emprego e Igualdade están recollidas e ben documentadas no Decreto 215/2020, do 3 de decembro, polo que se establece a estrutura orgánica da Consellería de Emprego e Igualdade. Este decreto publicouse no Diario Oficial de Galicia o xoves 17 de decembro de 2020 e é un documento relevante para o coñecemento profundo desta área administrativa que hoxe tratamos.
No artigo 28 do mencionado decreto descríbense as funcións e atribucións que ten a Dirección Xeral de Relacións Laborais e que describimos a continuación:
- Por unha banda establécense as funcións de dirección, coordinación, control e execución en materia de relacións laborais, seguridade e saúde laboral. Tamén aquelas funcións de responsabilidade social empresarial (RSE), promoción do emprego de calidade, lexislación laboral e prevención de riscos laborais (PRL) e outras funcións derivadas da autoridade laboral.
- Destácase o impulso e desenvolvemento de políticas de igualdade laboral e de medidas de conciliación corresponsable da vida persoal, familiar e laboral nas empresas. Dentro desta área é onde se desenvolve a actividade divulgativa do noso portal web www.aigualdadelaboral.gal, os perfís de redes sociais asociados a esta (Facebook e Linkedin) e todos os webinars e formacións que poñemos en marcha para a promoción en materia de igualdade laboral e conciliación.
- Coordinación e o impulso do diálogo social en Galicia, a través de conciliacións en conflitos laborais, eleccións sindicais, convenios colectivos, calendarios laborais, relacións co Consello Galego de Relacións Laborais e os Expedientes de Regulación de Emprego (ERE) e Expedientes de Regulación Temporal de Emprego ( ERTES).
- Funcións relativas á Inspección de Traballo e Seguridade Social en materia de laboral e de prevención de riscos laborais. Nesta área inclúese a coordinación coa Administración Xeral do Estado para a execución dos plans de actuación da Inspección de Traballo e Seguridade Social.
- O coñecemento e resolución dos recursos de alzada interpostos e tramitados polos órganos territoriais para a xestión de sancións nas materias laborais, de prevención de riscos e por obstrución do labor inspector, de conformidade co Decreto 70/2008, do 27 de marzo.
- Elaboración das propostas orzamentarias e a memoria da área, así como da xestión, seguimento e avaliación.
- Funcións derivadas do Decreto lexislativo 2/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de igualdade, no ámbito das competencias en materia de emprego atribuídas á consellería.
A estrutura da Dirección Xeral de Relacións Laborais
Dentro da Dirección Xeral de Relacións Laborais atópanse diferentes áreas para a xestión diaria das funcións descritas no apartado anterior.
![](https://aigualdadelaboral.gal/wp-content/uploads/2021/07/direccion-xeral-relacions-laborais-xunta-1-1024x746.jpg)
A Dirección Xeral divídese en tres áreas principais. En primeiro lugar, atópase a Subdirección Xeral de Relacións Laborais, que para o desenvolvemento das súas funcións divídese no Servizo de Relacións Laborais e Seguridade e Saúde Laboral e no Servizo de Réxime Xurídico. En segundo e terceiro lugar respectivamente, atópanse a Unidade Administrativa de Igualdade e o Servizo de Verificación de Fondos.
A Subdirección Xeral de Relacións Laborais encárgase, entre outras funcións da promoción, coordinación, desenvolvemento, control e execución da RSE, a igualdade laboral e das medidas de conciliación corresponsable coa vida persoal, familiar e laboral nas empresas. Tamén das relacións laborais cos grupos de interese económicos e sociais. Ademais é a área encargada da coordinación dos rexistros administrativos e eleccións sindicais, das asociacións empresariais e sindicais e dos convenios colectivos (o denominado, REGCON).
Doutra banda, a Unidade Administrativa de Igualdade é o órgano de apoio que integra a dimensión de xénero no ámbito das competencias en materia de emprego, e está en permanente coordinación coa Secretaría Xeral da Igualdade.
No caso dos Servizos de Verificación de Fondos as súas funcións son as de planificación, coordinación e verificación do cumprimento das normas europeas, estatais e autonómicas, ademais da execución dos programas de axudas e subvencións para todas as medidas de políticas activas de emprego xestionados na Consellería de Emprego e Igualdade, entre outros.
Agora que xa nos presentamos só resta por comentar que aquí podedes atopar o directorio da Consellería de Emprego e Igualdade e leste é o portal específico da Dirección Xeral. Non dubides en contactar connosco para solucionar as túas dúbidas en materia de relacións laborais.